Bonnie:好溫和 非示威

【明報專訊】中大新聞與傳播學院三年級學生鄧敏琳（Bonnie），前日接受青協「青年服務大獎」時，當住特首同嘉賓面，就免費電視發牌事件促請梁振英（CY）施政要跟從民意，而一夜成名。


Bonnie噚日同Emily傾偈，佢話從來唔覺得自己係社運積極參與者，只係一個好普通嘅學生，「只係遇到好睇唔過眼嘅事先走出嚟」。佢又覺得「梁振英嘅出現，就證明要有普選，至少有普選，你先有方法踢走佢（梁）」。


「梁的出現 證明要有普選」

突然成為網絡紅人，Bonnie透露，原來當日一齊出席頒獎禮嘅同學亦有份創作佢份演辭，佢話本身唔係特別鍾意港視主席王維基，因為喺中大聽過王維基講座，覺得呢個人都係「商人mindset（頭腦）」，講明唔會搞對抗，電視節目係要穩定社會，但政府「無啦啦攔一攔」唔發牌（畀港視），又唔解釋，先係佢發聲原因。


Bonnie形容社會對電視發牌有好多揣測，更有人話係「黑箱作業」，佢覺得政府初時以行會保密制為由唔肯解釋，其實反而鼓勵人去揣測係真。佢又批評政府後來發嘅6頁紙解釋，更被人「捉字蝨」同有「推搪」感覺。


有人將佢同喺演藝學院畢業生以屁股向住梁振英嘅示威相提並論，Bonnie就話，演藝學院係畢業生主場，佢哋當然可以選擇以自己方法去做，但前日佢係去「客場」接受獎項，算好被動，加上唔想模糊咗頒獎禮鼓勵年輕人嘅焦點，所以揀咗用本來用嚟多謝同學、老師嘅發言時間，好溫和咁表達自己及身邊朋友嘅意見，唔覺得自己係示威。


傾向參與佔中 又怕坐監

Bonnie話曾去過六四晚會同七一遊行，但係入讀中大之後，要去立法會採訪做功課，先識分清民建聯同民主黨。社會熱議佔領中環，Bonnie話無參加過商討日（D-Day），只傾向他日參與佔中，但又驚坐監，可能到「要count（計算）人頭要求政府回應一啲嘢」時才加入。至於支持乜嘢政改，Bonnie亦話無仔細留意，但贊同要有公民提名。


中大校長沈祖堯噚日話「年輕人好直」、「表達意見無可厚非」，又話Bonnie「講唔希望香港年輕人同政府有個對抗，都係一件好事，希望年輕人可以從一個積極角度睇吓點樣去幫香港社會做得更加好」。