陳健民交流聽往事

【明報專訊】佔中三子之一嘅朱耀明早前去台灣見民進黨前主席施明德，被建制派同中方猛批，話佢勾結台獨。不過另一佔中發起人陳健民就無有怕，喺facebook分享佢同「外國勢力」嘅交流。佢早前去咗國立首爾大學參加東亞社會運動研討會，喺facebook提及韓國教授大談造汽油彈嘅情况、物料如何控制同擲汽油彈抗爭嘅經歷。


稱絕非鼓吹暴力

陳健民話，擲汽油彈、坐牢幾乎成為嗰代韓國大學生嘅集體回憶。佢同Emily講，絕對唔係鼓吹暴力行為，而係想話畀香港市民知，人哋為咗民主，經歷咗乜嘢抗爭、犧牲咗乜嘢。相比之下，和平佔中嘅公民抗命行為代價係好低。


佢話，同大家分享韓國教授經歷，係希望香港可以避免使用類似手法爭取普選，但佢指如果以和平方式都爭取唔到普選，擔心新一代年輕人會以更激進手法去爭取。教授話今次嘅交流主要係講中、日、韓嘅公民社會運動，所以無特別講佔中，但就同當地學者分享香港嘅快樂抗爭運動。