調查：明年平均或派1.6月花紅

【明報專訊】臨近年尾又到打工仔最關心嘅派花紅日子，jobsDB噚日公布嚟緊一年薪酬同福利調查，佢哋上個月調查咗22個行業共124家企業，顯示明年企業發放花紅平均金額為1.6個月月薪，比今年平均數多0.1個月。派花紅公司中，金融業最豪，平均花紅5.3個月，較今年金融業3.3個月花紅多兩個月。明年派花紅較高嘅行業係物業發展（2.2個月）同製造業（1.9個月）。


jobsDB香港總經理饒志文話，今年經濟算平穩，故整體企業可維持良好業績，而金融業預計明年派5.3個月花紅，係金融海嘯後最高嘅花紅額。但佢講到明年整體加薪就相對審慎，有82%企業話會加薪，平均增幅3.8%，換言之人工加幅或跑輸4%通脹率。


新地聯席主席兼董事總經理郭炳江噚日亦講到，受惠內地經濟靠穩，本港經濟將持續向好，相信未來一年集團旗下員工都會加薪同獲派花紅，仲話「加薪幅度唔會低過同業」。