批評李小加 張華峰「有飯食」

【明報專訊】立法會議員張華峰同港交所（0388）行政總裁李小加可謂歡喜冤家，由前年交易時段加時開始已經成日針鋒相對，早排小加總裁為阿里巴巴單刁開路，寫咗篇「小加說夢」網誌，張華峰就撰文批評小加，話香港金融市場賴以成功嘅係良好嘅上市審批制度，而唔係一位高舉個人英雄主義嘅決策者。


中環花生友睇佢哋筆戰固然開心，原來呢件事仲有下文，就係佢兩位老哥連同港交所主席周松崗食咗餐飯。3位喺飯局上傾咗啲咩，張華峰冇具體講，只係話交流吓。周松崗一向交際手腕極圓滑，小琴估計飯局氣氛唔會太差嘅。


不過張議員就同小琴呻，原本佢想喺立法會財經事務委員會上動議，要求港交所好似巴士公司或港鐵（0066）咁定時定候上去交代經營狀况，但似乎觸動咗某人神經，最終有人勸張議員唔好提呢件事，結果張議員暫息干戈。張議員就話，交易所話晒係做獨市生意，多啲同公眾溝通唔係壞事，唔明點解有人咁大反應喎。