解放軍公大友誼波

【明報專訊】解放軍駐港部隊噚日去公開大學聯誼，仲打咗場友誼波，對手係公大籃球學會隊員。熱身時，Emily已好戥公大隊擔心，事關未開波已「高下立見」，解放軍隊個個都高大，平均都高過公大隊員。不過，作客嘅解放軍隊好「禮讓」，開場jump波時唔跳唔爭，主場公大隊「成功」搶波，首先得分。


解放軍嘅臂力強大，左邊場底線大力一傳，波即飛去右邊場底線，公大隊跳高企圖攔波，就連波都掂唔到。公大隊攞咗頭威後，比數一直落後，仲係遠遠畀人拋離。解放軍隊下半場換走幾個高佬入去休息，公大隊最終輸38比50。公大隊前隊長話，對解放軍隊嘅壓力好大，所以失誤都多咗。