謝偉俊自喻「非親生」

【明報專訊】港府前晚突然公布基本法委員會主任李飛、副主任張榮順今日訪港，立法會噚日晨早已鬧哄哄，大家都猜想，邊個聽日「有資格」去李飛飯局。Emily中午見到阿Paul謝偉俊，問佢有無份食飯，佢笑言，可能因為自己唔係中央「親生」，所以收風慢人一步，唔知有無份去，仲自嘲一句「契仔吖嘛」就轉身而去。但過咗無耐就證實咗，阿Paul可以用政制事務委員會副主席身分去食飯！咁樣，被人形容為「西環契仔」嘅阿Paul，唔通今後可改稱為「親生仔」？


講開呢單京官訪港事件，唔知點解政府事前神神秘秘，好多建制派中人都話無收到風。民主黨主席劉慧卿噚日見到Emily就好激氣，佢條氣唔順並非因為眼紅人哋有得去飯局，而係唔滿意政制及內地事務局副局長劉江華。


卿姐鬧劉江華瞞京官來港

卿姐話，周一先同「劉華」食飯傾政改，當時劉華都唔肯講佢知京官會訪港，卿姐反問點解要咁神秘？佢又話，當時已同劉華講，中央可參與政改，但特區政府要採主導角色，但過一日政府便公布京官來港談政改。講到呢度，卿姐話要去鬧吓劉華，問佢做乜要隱瞞佢喎。


無論如何，有政圈中人講笑，京官來港某程度係打救咗特首梁振英，因為新聞輿論視線會去咗呢單新聞，而唔係日日追住梁振英問電視發牌。