巨型「蒲公英」飄到冬日節

【明報專訊】旅發局喺下星期五（11月29日）至明年元旦，連續第12年舉辦繽紛冬日節，重頭戲之一係中環皇后像廣場嘅大型聖誕裝飾。旅發局話，現場嘅大型藝術裝置《WISH》由美國年輕藝術家設計，用3棵約5層樓高嘅巨型蒲公英及18粒大型種子組成，裝置高達15米，配以特別燈光同音效，會喺每晚6點就亮燈。


其他節目包括跨年煙火倒數、巴士夜遊同埋主題公園嘅聖誕活動等。旅發局話每年嘅聖誕新年黃金檔期都舉辦有關活動，係希望可以向短途嘅年輕及家庭旅客推廣，鼓勵佢哋來港過節。


旅發局總幹事劉鎮漢就話，今年截至10月有近4500萬人次訪港，預計下個月嘅繽紛冬日節可吸引近500萬人次來港，相信全年訪港旅客數字與原先估計嘅5200萬人次相若。