燈柱或設Wi-Fi裝置

【明報專訊】現時喺香港430個公共場地，政府都有提供免費Wi-Fi，政府透露，路政署年底前會審批一間營運商喺燈柱加裝Wi-Fi裝置嘅申請，以提供公共Wi-Fi服務，如果獲批，到時市民出街上網就更方便。


審計署年初批評政府嘅「WiFi通」耗資2.1億元，但上網速度極慢，過百場地每日不足15人使用。商務及經濟發展局噚日書面回覆立法會查詢時話，今年10月起，已提升每個使用者嘅頻寬上限至每秒3Mbps，並加強每月抽查次數，監察服務水平。而WiFi通自09年推出以來，日均使用人數由700增至今年10月嘅超過2.6萬。


兩營辦商提申請 一已測試

關於喺燈柱安裝Wi-Fi裝置，局方話兩間營辦商曾經向通訊辦及相關部門提交試驗申請，目前其中一間營辦商已做測試，政府部門亦就另一間嘅試驗計劃提供意見。為方便營辦商選擇合適燈柱，路政署已提供清單，篩選出可供用作裝設Wi-Fi裝置嘅街燈資料。營辦商正協調及統一其Wi-Fi裝置設計，預計年底前交畀路政署審批。政府就建議先喺人流較多位置設立Wi-Fi熱點。