夏千福再見傳媒唔講政治

【明報專訊】美國駐港總領事夏千福（Clifford A. Hart）繼早前公開演講後，噚日再約傳媒見面，Emily以為夏千福有乜嘢要悄悄地講，點知夏千福全程不談政治，亦唔講雞批或醬油味道，原來佢要向傳媒交代佢10月尾率香港商界組團訪美，出席華盛頓「選擇美國」（SelectUSA 2013）大型投資峰會招商嘅成果。


由商界談訪美團見聞

夏千福話美國好重視中港台三地商人赴美投資，噚日仲搵咗招商團兩名團員﹕工業總會前主席孫啟烈、德勤亞太區執行總裁鄭莉莉大談招商團嘅體會，兩個團員大談所見所聞無停口，相反夏千福就比較靜，除咗開場發言外就少搭嘴，被問到港人免簽證赴美進展時，佢就簡短回應話未有新進展。


Emily見夏千福咁靜，於是就問佢幾時會再出動「落區」試食，仲建議佢不妨挑戰一下去明將食壽司，不過佢就反應麻麻。夏千福下個月2號就會應立法會主席曾鈺成邀請，與一眾新任總領事出席立法會午宴同議員交流。