財爺自爆愛科幻劇Dr Who

【明報專訊】港府同政界就政制發展忙到團團轉之際，財爺曾俊華近期到訪英法，Emily聽講佢訪英時出席貿發局喺倫敦設嘅「香港晚宴」，致辭時講起佢係超級科幻迷，曾經極之鍾情已有50周年歷史嘅英國科幻劇Dr Who；香港回歸初年佢任港府駐倫敦經貿辦主任時，就不停追劇，其後又畀佢發現，劇中主要角色機械人Dalek於1964年第一代嘅玩具，原來係香港製造。


話說Dr Who劇喺英國風行多年，近期適值首播50年，王室仲幫佢喺白金漢宮搞咗酒會，劇組製作人員同埋機械角色Dalek都有出席。


講番「香港晚宴」，財爺致辭時話，近日訪英見到Dr Who又見報，自然表露一下粉絲心聲。晚宴上，英國商業創新及技能大臣Dr Vincent Cable、鄧蓮如女男爵、貿發局主席蘇澤光也在座。財爺訪英行程已完結，噚日去咗法國巴黎，會出席當地港人嘅聚會。