CY又落區 袁彌明蒐鞋掟

【明報專訊】特首梁振英（CY）過去幾次落區嘅場面都好混亂，場內場外不時出現兩陣對罵，嘈到拆天，不過梁振英無有怕，嚟緊星期日（24日）會就施政報告到沙田舉行第一個地區諮詢。人民力量主席袁彌明（Erica）話，會有人排隊攞飛，另計劃參考台灣人反對總統馬英九嘅做法，嚟緊會收集市民嘅「臭鞋」，搵個機會掟向梁振英。


Erica透露，佢話星期日會場外就會第一次收集「臭鞋」，日後亦會喺各區做，等啲唔鍾意示威但又想表達對政府不滿嘅人都能參與，有信心可以收到幾萬對鞋。佢又批評民政總署要排隊攞飛嘅安排好差，梁振英落區只係個幾鐘，但就要泛民、建制甚至長者齊齊瞓街十幾個鐘。


社民連副主席吳文遠噚日都係透過記者先知CY落區，所以目前未決定具體行動，但就肯定該黨會到現場，不過佢都反應好快，噚日已經喺facebook表明當日兩點會去狙擊特首喇。


9時沙官外派飛 警力三四百

諮詢會喺周日下晝兩點半至4點舉行，今次梁振英唔係單人匹馬，陪佢嘅有財經事務及庫務局長陳家強、運輸及房屋局長張炳良及環境局長黃錦星，當日9點起就會喺會場（沙田官立中學）外向公眾派飛，先到先得。


Emily聽聞，警方周日會部署300至400警力維持秩序，同CY上幾次落區差唔多，家未收到示威申請，但會留意未來兩天情况會唔會變。