高永文變「衛食局長」

【明報專訊】特首梁振英（CY）、政務司長林鄭月娥同多名問責官員，噚日出席地方行政高峰會匯報交流總結會，但今次高峰會就反映咗地區同政策局之間有幾疏離，好似離島區議會主席周轉香咁，談及離島渡輪航線年年蝕無人營運時，多次話曾向「交通及房屋局」反映，其後又簡稱呢個局做「房運局」，查實管呢樣嘢嘅政策局叫「運輸及房屋局」。


出席高峰會 林鄭閉目托腮

深水埗區議會主席郭振華講臨時家禽市場時，亦幫食物及衛生局長高永文「改」咗個「花名」，就係「衛食局長」，搞到連CY都話要處理好「衛食」嘅問題。面對呢班區議會主席，林鄭時不時閉目養神，有幾個moment仲托住腮，而林太今日仲要出席宴請全國人大常委會副秘書長李飛，喺禮賓府嘅午宴，睇嚟有排都未有得休息。


南區區議會主席朱慶虹就話民政專員（DO）權力唔夠，建議DO變做問責官員，又話問過南區專員，對方都同意。CY就承認，地區嘅專員協調、溝通角色強，但統籌角色弱，決策角色更弱，長期嚟講，喺符合《基本法》情况下，可以喺體制同職能上改革。