新聞類別
港聞
詳情#
【明報專訊】噚日喺香港電台上演咗一場激烈嘅「2013大專普通話辯論賽」，由舊年宿敵香港中文大學同香港浸會大學再次對壘，辯題就係城中熱話佔中問題。最終由代表撐佔中立場嘅中大勝出，身為評判嘅立法會主席曾鈺成上台講評審工作嗰時，就好「醒目」同佔中劃清界線，即刻話畀邊隊高分，唔代表佢認同嗰隊講嘅觀念喎！
「畀高分唔代表認同」
另一評判、立法會議員陳家洛就讚晒正反兩邊嘅同學仔，話今場比賽係佢今年聽咗4場同類型辯論題中最精彩嘅一場。
今次辯題係「佔領中環對香港民主進程利多於弊/弊多於利？」正方中大嘅同學喺辯論時，提出咗好多撐佔中嘅理據，話提出公民參與係爭取民主最重要嘅一環，又強調「佔中唔係亂港而係救港」。中大隊員仲語帶激動咁話「民主唔係等嚟嘅，係要爭取番嚟！」聽到台下觀眾都拍爛手掌。
浸大抽中反方：要說服自己
反方嘅浸大同學就以佔中係一種對中央嘅威脅，同時會癱瘓經濟，認為佔中係「弊多於利」。佢地話中央係唔會向呢種威脅低頭，叫正方同學認清事實咁話。
不過，事後浸大同學仔分享嘅時候講到，抽到要做反方嘅時候都好擔心，要不斷說服自己咁話！
回應 (0)
