慈善跑籌得千萬 助防母嬰傳愛滋

【明報專訊】今個星期日（12月1日）係「世界愛滋病日」，聯合國兒童基金會噚日喺迪士尼樂園舉辦第8屆慈善跑活動，有1.4萬人參加，係歷來最多一屆，籌款數字突破1000萬，夠畀超過62萬個感染愛滋病嘅孕婦，接受一日分量嘅「一日一藥」簡單療法，取代以往每日3粒嘅傳統藥物，仲可以幫助佢哋有效控制病情，預防嬰兒經由母體感染愛滋病毒，長遠目標係達到「零愛滋」世代。


愛滋孕婦受惠

政務司長林鄭月娥噚日都有出席活動，佢致辭嘅時候話，世界面臨各種天然同人為嘅威脅，兒童往往首當其衝，好似菲律賓早前受到超級颱風海燕吹襲，災情嚴重，每當電視播出災區畫面，特別係見到兒童瑟縮無助嘅慘况，佢都會感到好痛心，呼籲市民支持呢項長跑賽事，為兒童抗愛滋出一分力。