2012年報App 有埋Android版

【明報專訊】政府新聞處噚日公布，最新一期刊物《香港2012》已經推出iPad及Android應用程式可供下載。呢個電子版刊物，其實係將7月出版嘅文字版《香港2012》電子化，以往只有iPad版，今年就首次推出Android版本。不過，家都差唔多到2013年年底，先推出《香港2012》電子版，時間上可能有少少落差喇。


講番《香港2012》，附頁有記錄2012年大事，去年大事當然包括梁振英當選特首，亦提到七一遊行，話「對於有數以萬計的香港市民參加遊行，政府表示尊重市民遊行和發表意見的權利」。2012年仲有國教科風波，而當年9月8日，就話有「數千名市民在添馬政府總部外集會，政府表示了解社會的關注」，所以宣布唔會為國教科設下推行期限。