梁鳳儀﹕黃宜弘唔講粗口

【明報專訊】建制派定期有飯局聯誼，噚日中午又嚟一個飯局，除咗建制黨派議員、代表外，連立法會主席曾鈺成、基本法委員會副主任梁愛詩都有現身，同場亦有唔少前議員，好似李國寶、劉秀成等，一齊聚集喺中華總商會食飯。有咩事要咁大陣仗？原來係前立法會議員黃宜弘下個月生日，佢老婆梁鳳儀就幫佢約老友預祝。


下月底75歲生日嘅黃宜弘唔再係議員，但仍然同一班舊朋友聯絡，黃太噚日就幫佢約咗成班舊朋友，筵開四五圍搞神秘party。有與會者透露，梁愛詩都畀面現身，雖然無坐低食飯，但有買禮物。Emily聽聞，除咗民建聯主席譚耀宗、工聯會黃國健、經民聯主席梁君彥等，亦有好多前議員出席，好似李國寶、劉健儀、黃容根，甚至工聯會榮譽會長鄭耀棠，以及中聯辦部分官員都有到場。


黃太想做CE

因曾舉中指而被稱為「中指黃」嘅黃宜弘，兩夫婦出名恩愛，據聞梁鳳儀亦發表愛的宣言，當住賓客面話好愛老公，又好搞笑咁話，全家人都知「中指黃」唔講粗口，但唔知點解佢當年會向市民舉中指；又話自己打算做「CE」（特首英文簡稱），但呢個CE係講緊Chief-entertainment Officer，即係首席娛樂官員咁話。