港視留守十子 周六政總野餐

【明報專訊】曾留守政府總部嘅香港電視10人，會喺本周六重返添馬公園，但唔係搞遊行集會，只係有野餐分享會，帶備「一籃子水果」、「誠實豆沙包」同「民建聯最毛柿」等食物，同到場市民傾吓對發牌事件睇法，又會收集民意，考慮後續行動。


留守者之一、港視前高級編導蔡錦源話，佢哋唔想件事就咁完，希望透過野餐會畀市民知道件事影響可以幾深遠，又話外國不時有呢類活動，唔一定要示威。蔡導仲話，佢哋10人整理緊嗰18晚留守政總嘅資料，希望可以年底前出書，又話會參加明年元旦大遊行，但要睇主辦單位安排。


另外，香港電視網絡職工會主席楊志豪都有提到，工會預計下個月起收集市民簽名，要求政府就發牌決定交代，暫定港島、九龍都有街站，又打算參與元旦遊行，但話唔少港視前員工都另有工作在身，有進一步詳情會再公布。