戴教授扮校工講普選

【明報專訊】「佔領中環」呢個話題都幾重口味，點樣可以容易讓人明白呢？佔中發起人之一兼港大學者戴耀廷平時西裝骨骨，但網上有段名為《公民學堂—和平佔中預備班》短片，就見到戴教授一身校工造型，著住件冇扣鈕嘅格仔恤，襯白背心，拎住掃帚同一包薯片行出嚟，問﹕「香港家有乜問題呀？搞咁多嘢做乜先？」原來佢係想搞搞新意思，以簡單方式向市民解構一下佔中嘅緣由。


拍短片 問「搞咁多嘢做乜？」

呢條長兩分鐘嘅短片，除咗有戴教授粉墨登場，仲有一個學生哥朗讀一段叫〈家是香港〉嘅文章，作者係「5毛」，笑話香港面對嘅問題好小事，「除咗貧富懸殊擴大、土地同產業政策太過單一，仲有環保、保育、醫療、房屋、教育……同埋人口老化、同埋移民政策咁囉」，又話特首係小圈子選出，「無論佢係狼、係豬、係狗都好啦」，政策都唔會得到廣大市民支持。


學生哥又話，最重要係「如果繼續冇一個真正普及而平等嘅選舉，市民又繼續食得、瞓得、玩得喇喎……香港咪又繼續hea多十年八載咁之嘛」。戴教授仲要一臉狐疑咁問﹕「真係咁多問題？」相信佢係想以小市民角度出發，「易入口」地解釋，最後仲話「普選是解決問題的開始」。