3政助棘手工作陸續有嚟

【明報專訊】打政府工呢樣嘢，永遠都有人辭官歸故里，有人漏夜趕科場，噚日政府公布財經事務及庫務局副局長梁鳳儀請辭，但就兩人加入。不過，梁鳳儀已經係問責班子中請辭嘅第五人，所以大家都好關心，仲有無人會走？


噚日政制及內地事務局政治助理陳岳鵬（左起）、食物及衛生局政治助理陳凱欣、財政司政治助理羅永聰，咁啱一齊現身立法會，有人問佢哋會唔會係第六、七、八人辭職呢？

點知有政府官員講笑咁話，佢哋就會排住隊喇，一個搞政改、一個搞限奶令，又一個協助搞財政預算案，3件都係棘手工作，笑佢哋隨時都有機會走人咁講。雖然有人咁講笑，佢哋3人仍然肯大方合照，睇嚟所謂「辭職」都係講笑而已。