得獎佳餚 28元有得食

【明報專訊】旅發局一年一度嘅「美食之最」大賞已經有結果，今年嚟自8間食肆嘅八道佳餚攞到最高榮譽金獎。靚嘢唔一定貴，例如點心組得獎作品「芝心海皇千絲春卷」，彩福皇宴嘅師傅用鮮蝦、帶子餡混埋芝心，再用麵包絲做春卷皮，夠晒創意，一碟28元。


玩fusion 整鵝肝小籠包

同組嘅「翡翠水晶八式小籠包」亦都玩fushion，除咗傳統豬肉小籠包，仲有鵝肝、口水雞、芝士、黑松露等8種口味，喺特定嘅翡翠拉麵小籠包分店可以用88蚊食到。


挖空青瓜見刀工

隔籬組「一魚兩吃」得獎作品就走矜貴路線，帝苑酒店中菜廳東來順嘅「左右逢魚」，將原條新鮮東星斑炒、炸，盛惠1288元；另一款350元嘅「翠竹雙輝」就好考慶公宴嘅師傅刀工，佢挖空原條青瓜、每邊切到得1毫米薄，變身成一條青竹，再將炒好嘅桂花魚肉釀入去，砌到好似幅國畫咁靚。


每款得獎佳餚喺各間餐廳已經有得食，價格有平有貴（見表），想試邊款就隨自己喜好啦。