監警秘書長：怕食甜品

【明報專訊】監警會主席翟紹唐（翟少）下年5月底任滿，早前佢接受Emily訪問時，話明希望政府唔好選「乜粉、乜嘢甜品嘅人」做繼任人，話咁樣好難做嘢喎。


稱監警會慳家 舊嘢照用

查實唔止佢一個有呢個擔憂，有即將任滿嘅委員話，續唔續任要睇定啲，仲話自己「寒底，怕食甜品」。咁啱秘書長朱敏健下個月任滿，Emily問佢唔通又係怕食乜粉乜甜品？夠鐘退休嘅朱sir就話，續唔續任，要睇條件如何。唔通翟少一走，監警會會「星散」？


前廉政專員湯顯明噚日畀帳委會譴責，但翟少笑言監警會「好慳家」，佢哋2009年轉做法定機構之前叫「警監會」，整咗嘅紀念品，家都會循環再用。好似啲水晶座，佢哋之前用百零蚊起咗個「警監會」金屬牌，整番個「監警會」牌落去，咁就可以再用，至於「警監會」水杯就留番內部開會用。


Emily覺得，如果個個政府部門都好似監警會咁，就唔會再有貪腐醜聞喇。