梁鳳儀：首務補眠

【明報專訊】港府前日宣布財經事務及庫務局副局長梁鳳儀（Julia）提出請辭，政經界唔少人都有啲意外，事關Julia唔止係副局長中較資深嘅一人，亦係芸芸副局長中口碑較佳嘅一人。Julia成為梁振英政府第五個請辭嘅問責官員，好多人猜測佢係咪喺政府做得太辛苦呢，Julia噚日出席活動時就重申，辭職只係個人決定，至於去向如何？佢就話退下火線後最緊要係「補眠」。


餘下一月做好交接

Julia前日一直無親自交代請辭因由，佢噚日出席中國上市公司海外高峰論壇活動致辭時，藉活動主題「轉型與機遇」借題發揮，話自己家都正值轉型。Julia話，當年由做記者轉到金管局工作，2008年離開金管局加入政府做副局長，加埋今次辭職，會經歷人生三度轉型，每一次都對佢嘅能力、知識與經驗有所提升。


Julia話佢會喺餘下一個月，同佢嘅接任人劉怡翔做好交接，然後迎接人生第三次轉型。