人太少易認出不丹反貪難

【明報專訊】廉政公署一向有舉辦「總調查主任指揮課程」，旨在畀世界各地嘅反貪部門交流執法心得，兼訓練領導能力，課程今年去到第33屆，有9個來自法國、新加坡以至不丹等地嘅反貪人員來港。廉署總調查主任梁永琴同Emily講，原來不丹反貪時最頭痛係個國家太少人（70多萬），好易畀人識穿佢哋嘅調查行動，而且每次都要有好嚴謹嘅申報，確保目標人物唔係親友。


廉署與各地交流 葉劉講課

今次課程仲有15名來自廉署，5名來自警隊、懲教同消防等部門，以及4名來自內地、澳門嘅執法者參與，佢哋要經歷近一個月嘅外展訓練，兼去天津反貪部門考察，了解內地防貪工作。被編配同不丹學員同組嘅梁永琴，就轉述組員話當地貪污案集中喺公營機構，所以有獨立部門處理案件，但就遇上好易畀人認出嘅問題。


另一學員澳洲聯邦警隊偵緝警司石克沙（Paul Shakeshaft），同新加坡貪污調查局首席特派調查主任李俊強都話，課程係一個好好嘅交流平台。石克沙仲話，前保安局長葉劉淑儀都有嚟講課，令佢知道香港嘅政治背景同轉變。