CY插蘇送禮 港官O嘴

【明報專訊】特首梁振英日前出席廣西欽州市政府招待午宴，自爆話兩個月前曾喺禮賓府招呼東盟10國嘅經貿部長食飯，席間送小禮物畀嘉賓。到底禮物係乜？原來就係CY呢排成日掛喺口邊嘅「萬能插蘇」喇！


CY因為喺內地，所以佢嘅用詞係「轉換插頭」。據當日喺禮賓府嘅人士話，一眾東盟部長唔知咩事，收到用紙袋包住嘅禮物，打開原來係「萬能插蘇」，仲要係「Made in China」，在席有啲香港官員都O咗嘴。


政府內部議論

呢件事本來喺政府內部廣傳，但估唔到CY自爆出嚟，政府內部呢兩日茶餘飯後都議論，唔少人認為CY以「萬能插蘇」形容香港嘅角色，話香港可以將東盟10國同中國連繫起來，有人話呢個比喻麻麻。


陳志全：可能CY唔知萬能蘇另一含義

立法會議員陳志全話「萬能插蘇」有貶義，除了係電器配件名稱，背後係有另一含義，用嚟形容香港就唔係咁好喎，佢笑言可能CY唔知呢個詞嘅用法先至會用嚟做禮物。