港大謝李嘉誠「分期畀齊捐款」

【明報專訊】長實主席李嘉誠早前被質疑「走數」，話佢8年前承諾捐10億畀港大醫學院，但多年來都未捐晒錢咁話。港大醫學院長梁卓偉前日喺醫學院畢業禮致辭時透露，原來醫學院已經收齊10億捐款，仲多謝誠哥肯「分期捐款」，令港大醫學院可將捐款分幾次申請政府配對補助金計劃，盡可能獲得更多政府資助咁話。


梁卓偉：助申配對基金 資助更多

梁卓偉向畢業生致辭時話，10億元捐款對學院具變革意義，短期內會利用款項成立學院首個永久捐贈基金，長遠希望港大可培育下一代臨牀科學家，甚至香港第一代嘅生物科技企業家。