廉署執行處一哥﹕唔會亂交朋友

【明報專訊】近年廉署風雨多，前廉政專員湯顯明事件令該署元氣大傷，唔少廉署人盼明年適逢40周年有個新開始；而中大新聞與傳播學院嘅學生刊物《大學線》，最近一期訪問咗廉署中人，講吓「廉政四十 光明中的風與浪」，當中訪問咗中大生化系畢業嘅廉署執行處「一哥」、即首長黃世照（Ryan），佢回應湯顯明事件時坦言，事件「影響市民對廉署的形象，是不得不正視的問題」，相信廉署會趁呢個機會檢討不妥當或需改進之處，克服困難，好似做身體檢查咁。


大學線班同學好有心，Emily見佢哋搵咗1976年聯合書院校刊中生物化學系系會成員名單（圖），擔任學術及財政兩職位者，正係現任廉政專員白韞六同黃世照。黃世照喺訪問中都講，能同舊同學白韞六喺同一個地方工作，合作起來自然特別有默契。同學仔喺訪問後都有寫番個手記，吸引到Emily注意嘅係，手記提到黃世照有分享做廉署多年，會自發咁注意個人道德操守，唔會亂交朋友！