民記課程 「幫港」中堅有份教

【明報專訊】民建聯第三屆政治專才課程開始招生，今年有好多猛人做導師，包括反佔中嘅「幫港出聲」召集人鄭赤琰教授，至於曾經係導師嘅佔中發起人戴耀廷同陳健民，今年就無咗影。民建聯培訓委員會主席馮培漳解釋話要balance （平衡）不同學者嘅背景，費事畀人話傾斜某一邊，仲話好慶幸可以吸引一班沉默大多數參加呢個課程。


堂上討論「無禁區」

翻查資料，戴耀廷係第一屆導師，負責教「香港政策的發展和爭議」；陳健民喺第二屆教「公民社會與善治﹕中國的困境與出路」。負責課程設計嘅香港專業進修學校校長陳卓禧話，課程焦點不在講者背景，而係希望參加嘅同學深入了解唔同課題，強調堂上嘅討論係「無禁區無限制」。


張國鈞：一半畢業生入民建聯

民建聯副主席張國鈞話課程旨在培訓政治人才，強調學生嘅背景多元化。但馮培漳就認，過去大約有一半畢業生會加入民建聯，仲好開心咁話學員「由不理解民建聯到理解，由不支持民建聯到支持」。


今年有10多名政界猛人同學者助陣講書，包括兩個新面孔﹕新婚嘅中文大學社會科學院副教授沈旭暉、民建聯立法會議員李慧琼。有興趣者可上民建聯網頁（www.dab.org.hk）了解一下。