得獎煙花 周日馬場發放

【明報專訊】本月8日（周日）舉行嘅「浪琴表香港國際賽事」，係馬場盛事，馬會為咗吸引馬迷入場，除咗有巨額獎金，當晚賽後沙田馬場會大放煙花。馬會話，今次請來港星多媒體製作有限公司設計總監毛偉誠協助，發放佢哋今年8月喺法國康城煙花大賽嘅得獎作品「漁翁撒網」。馬會賣花讚花香，話觀眾喺75米近距離觀賞呢款煙花，畫面會好震撼，機會難能可貴喎。


「漁翁撒網」特別效果

法國康城煙火大賽得獎作品，係以9個發射處共81個角度，造出「漁翁撒網（Netting Formation）」特別效果。作品「移師」沙田馬場上演，規模大咗，提供21個發射處共189個角度。


講番場國際賽，係全球其中一個獎金最豐富嘅賽馬日，總獎金高達7200萬港元。其中浪琴表香港盃獎金為2200萬，浪琴表香港一哩錦標嘅獎金則為2000萬，而浪琴表香港短途錦標和浪琴表香港瓶嘅獎金，皆為1500萬元。