和平佔中澄清與「後援會」無關

【明報專訊】「和平佔中」秘書處噚日發聲明，澄清最近成立嘅「佔中後援會」唔係隸屬「和平佔中」，提醒大家捐款時要留意，仲強調無計劃元旦啟動佔中！後援會召集人、人民力量嘅譚得志（快咇）就回應話，後援會成立之際已表明同佔中無關，但強調籌到嘅錢會用喺將來和平佔中運動。


被批「抽水」 快咇：已表明無關

「佔中後援會」係由人民力量同社民連成員合作成立，旨在「夾實佔中，堅搞普選」。佢哋有擺街站同派單張叫人支持佔中，仲開咗個戶口叫人捐錢，但畀網民批評「抽水」，家仲搞到秘書處發聲明劃清界線。據知，其實其他團體都有搞吓後援會，但人哋會有自己嘅牌頭，但人力呢個後援會就咁叫「佔中後援會」，市民唔知真係好易混淆，所以秘書處唯有澄清，並提醒不同關注組或後援會舉辦活動前，最好先同秘書處協調。


快咇喺facebook回應秘書處聲明話「大業未竟，卻自絕盟友；冷血狂徒，借機弄是非」。佢同Emily解釋，話後援會籌款係因為要擺街站叫人支持佔中，幫佔中召集人戴耀廷呼喚1萬個死士出嚟，強調如果將來和平佔中無錢搞運動，會畀晒啲錢佢哋。