柯清輝﹕思捷最壞時間已過

【明報專訊】思捷（0330）10月底公布嘅季績麻麻，但主席柯清輝同副主席鄭明訓之後各擲千萬元買入公司股票，刺激股價由當時13、14蚊，快速升到最近16蚊樓上。大家當然都想知柯生幾時會再增持，噚日佢響股東會後話，都要睇吓荷包有冇錢、自己做其他投資嘅表現、同資金係咪回到籠喎。不過佢又話，如果從選擇股票嘅角度睇，「我個人判斷（思捷）最壞嘅時間已過喇」。


柯生又話，做咗思捷董事成10年，「（對思捷）感情相當好，希望佢未來會更好」。佢話管理團隊家全部到位，未來應該唔會再有大變動，買股正係表示對佢哋有信心。雖則股價有升，噚日有小股東似乎對公司送嘅禮物唔多滿意，覺得公司出手「cheap咗」。今年思捷禮物包有一盒曲奇餅、一大塊朱古力同一條Esprit頸巾，舊年就送遮、相架同毛巾大中細碼各一條。不過都有小股東話，收到野食開心啲。


CEO認正研新品牌

近日有外媒報道，思捷準備推出新品牌，噚日行政總裁馬浩思確認正在研發中，會先以概念方式發展個品牌，之後會盡快測試，睇吓個品牌有冇潛力發展成連鎖模式。至於會唔會再通過裁員節省成本，佢就話公司有責任減低營運開支，未來要睇吓仲有冇精簡架構同提高效率嘅空間，「有時會不幸地影響到某啲人，但有時都唔會」。


email: piano@mingpao.com

【小琴密語】