港人對菲律賓最反感

【明報專訊】港大民意研究計劃噚日公布「香港市民對各地政府及人民的觀感調查」結果，發現港人最唔鍾意菲律賓人民同菲政府，對菲政府嘅反感淨值更加升到1997年以來新高，有成89%。港人對日本政府都唔見得有好感，反感淨值都有51%。不過調查都發現，港人對內地人嘅觀感改善咗，反感淨值由半年前嘅15%回落到5%。


對內地人觀感改善

民意研究計劃總監鍾庭耀話，港人對菲律賓、日本、美國同泰國政府都係反感居多，對所有人民都係好感居多，但菲律賓人除外，值得各國政府深入研究。


調查喺上月22日到28日進行，分兩階段以隨機抽樣方式，分別訪問咗1026同1030個市民。第一階段，受訪者喺未經提示下，講出最多10個最熟悉嘅地區或國家，最多被提及嘅12個國家地區，就會連同兩岸四地共16個地區同國家進入第二階段意見調查，由受訪者就各地政府同人民作出評價。