「五步曲」掀正字爭拗

【明報專訊】人大2004年釋法，將原本嘅政改「三部曲」變做政改「五部曲」，大家講咗「五部曲」近10年，但政府噚日諮詢文件就仍寫作「五步曲」，究竟邊個先係正字？Emily查番政府新聞稿，發現兩個寫法過往都有出現過。


立法會議員黃毓民噚日趁機發難，提出一項「規程問題」，請教主席曾鈺成政府有無寫錯字。曾主席就話通常係用部分嘅「部」，而唔係步行嘅「步」，但家香港時興專登加個引號，一改詞語本身嘅「正當」用法。毓民就話主席講得好，順勢批評政府今次諮詢「唔正當、行歪路」，緊接再當面話政務司長林鄭月娥係「奴才」云云。此時，民建聯葉國謙彈起護駕，話毓民用字侮辱官員，要求主席裁決，正字風波足足搞咗6分鐘。


學者﹕應用五部曲

Emily問過中大中國語言及文學系副教授黃念欣，佢話規範嘅中文應該用「五部曲」，「五部曲嘅意思係一首曲入面有五個部分，而步伐就同曲無關」。不過，佢話步可解作步驟，用「五步曲」的話，都有一步一步嚟之意，冇話睇唔明嘅。黃教授仲話家啲廣告成日自創新詞語，加上寫五步曲時加咗「」，其實都可以接受。