諮詢網頁被指似林鄭選特首

【明報專訊】萬眾期待嘅政改諮詢文件噚日公布，最搶眼嘅應該係喺宣傳小冊子及宣傳網頁上，見到政務司長林鄭月娥、律政司長袁國強、政制及內地事務局長譚志源3人合照。唔少網民都對林鄭「擔大旗」有意見，民主黨區議員林立志就質疑，諮詢文件嘅facebook網頁，做到咁似林鄭去選特首，「咁快準備造勢！」有網民就話，小冊子嘅大相，似足叫市民一齊同林鄭月娥團隊實現願景咁話！


譚志源：落合照想有新意

譚志源（Raymond）被問到點解小冊子要有佢哋嘅合照？Raymond就好風趣，話粉墨登場係想畀多啲新意，而香港好快就可以實行普選，一人一票選特首，所以佢嘅表情笑得咁開心！至於份諮詢文件封面設計有好多「對話圓框」，就係想鼓勵大家有不同想法理念都可提出，促進達成共識。


用select特首 Ms Mo批言不及義

公民黨毛孟靜就話，諮詢文件英文名無用「electing（選舉）」一字，反而用上「Selecting（選擇） the Chief Executive」，佢質疑咁樣係「言不及義」。查實呢個「Selecting」一詞應該係由《基本法》抄出嚟，來自條文中「產生辦法（The method for selecting）」，似乎基本法中英文亦唔係好對照。