亞視﹕節目「重溫」非「重播」

【明報專訊】亞洲電視啲節目成日重播，不過，亞視高級副總裁葉家寶噚日接受商台訪問時，就話亞視本港台唔係「重播」，而係「重溫」，主持人問點解咁多重播節目時，葉家寶話香港人有懷舊情懷，一啲經典節目就重播嚟畀觀眾欣賞，「有啲市民日頭返工，就喺夜晚播番畀佢哋睇，同埋亞視有唔少節目係值得即日重溫㗎」。


話畀TVB抄 聽眾爆亞視抄英國

葉家寶又話，亞視黃金時段自製新節目比例已不斷上升，由2009年嘅32%，升到舊年嘅64%，不過如何改變節目安排都好，都一定有「重溫」，「重溫次數唔多，每日只係兩三次」，又話亞視集中發展時政、民生同資訊節目，節目好到連TVB都抄佢哋，例如亞視當年有個節目叫《歷史也瘋狂》，TVB就出咗個《瘋狂歷史補習社》。不過，幾分鐘後就有聽眾打上電台篤爆佢，話亞視都係抄英國BBC嘅Horrible Histories。


通訊局批評亞視缺乏有效企業管治，葉家寶回應話管治混亂分兩方面，股東及董事局管治，同電視台日常運作，而亞視日常運作冇問題。


主持人即刻追問佢係咪指管理層管治混亂？佢即刻話亞視「上下一心」。