好市民獎金加碼千元

【明報專訊】香港警務處每年都會舉行兩次「好市民獎」頒獎禮，表揚見義勇為、幫警察破案嘅市民。呢個計劃搞咗40年，得獎人數約4000。


港總商會獨家贊助40年

唔講唔知，原來獲獎市民有一張獎狀威威，仲有成千元獎金，全靠背後贊助呢個計劃嘅香港總商會。總商會趁今年係好市民獎40周年，決定今年起加碼獎金，由原來嘅2000至3000元，加到3000至4000元，銀碼雖然唔係好大，但加幅都有三至五成㗎。


入咗總商會兩年幾嘅總裁袁莎妮笑笑口話，雖然呢個獎有咗成40年，但佢自己起初都唔知原來總商會有份搞呢個獎，直至有日同事話要籌款，佢至知道總商會係「好市民獎」嘅獨家贊助機構。


袁莎妮話，除咗獎金加碼，趁今年「好市民獎」40周年，呢個月19號嘅頒獎禮，佢哋會搞大啲，警務處會請番一啲以前攞獎嘅好市民返嚟大家一齊開心，仲會特別頒3個「別具意義獎」，細節就暫時唔講住，留番神秘感咁話！