陳志雲涉貪案未結

【明報專訊】律政司長袁國強噚日朝早去商台節目《在晴朗的一天出發》，接受商台行政總裁陳志雲專訪。大家可能唔記得，無綫電視前業務總經理陳志雲涉貪案，袁國強今年3月曾以案件呈述方式，入稟對陳志雲提出上訴，案件仲未完結。有人就質疑，原告嘅律政司長出席「志雲大師」嘅訪問，是否恰當？


稱以政改小組成員身分受訪

律政司新聞組回覆話，袁國強噚日係以「政改諮詢專責小組」成員身分，履行宣傳諮詢工作嘅職責，節目期間仲有陳聰同郭志仁兩個主持人在場，過程公開，亦有其他傳媒；訪談同陳志雲所涉嘅上訴案完全無關，除出席訪問，兩人無任何私人接觸，所以今次電台活動並無唔恰當，亦談唔上破壞獨立性同公正性。


究竟袁國強噚日係以咩身分上電台？Emily聽番錄音，郭志仁介紹袁國強時，稱呼袁係政改諮詢專責小組成員、「我哋嘅律政司長」。「志雲大師」亦話，如果有關於政改嘅法律問題，係可以問「司長」嘅。成個節目亦以「司長」稱呼袁國強，咁點可以只當袁國強係「小組成員」呢？