財委批6345萬 搞APEC財長會議

【明報專訊】立法會財委會噚日通過批出6345萬元撥款，籌辦出年9月喺本港舉行嘅亞太經合組織（APEC）財長會議，費用包括場地、酒店住宿、接待來賓等。不過，出年APEC嘅主辦國其實係中國，香港只係獲批籌辦財長會議，工黨李卓人質疑點解要中央「請客」、香港「畀錢」咁話。


阿人：中央請客 香港畀錢

會議為期3天，會有21個組織成員，連同約800幾訪客訪港。政府話，今次會議開支參考過去APEC會議嘅規格，以應使得使、節儉又要得體嘅原則釐定。但阿人話，6000幾萬係「冤枉錢」，認為會議只討論經濟貿易，唔講民生，無大作為。資訊科技界議員莫乃光關注電腦保安，話擔心黑客會趁有國際人士訪港，襲擊電腦系統。


張宇人：推廣好機會

自由黨張宇人就話，今次係好機會，對外推廣香港國際金融中心地位。民建聯亦支持政府建議，最終財委會通過撥款。