Madam「多報」集會人數

【明報專訊】第三場施政報告及財政預算案諮詢會噚日喺大角嘴舉行，旺角警區副指揮官曾艷霜喺諮詢會完咗同傳媒講，場外有650人參與集會，但點解警方夜晚出新聞稿話得270人參與？警方話，場外示威者加埋場內參加者，先有600幾人，相信係Madam一時講錯，跟稿寫就啱喇。


噚日4點幾特首梁振英座駕離開會場後，大批警員留低善後，曾艷霜原本負責喺會場門口，同傳媒講解示威集會情况，點知事前突然有一個示威者舉牌呼叫，最終要等示威者走咗，警方再安排一架警車泊喺門口做記者會「布景」，擾攘十幾分鐘，「Madam曾」先至現身，唔知係咪擔心會有危險呢？「Madam曾」事後解釋，相信呢個係最合適安排，佢又話，噚日場外有部分人衝出馬路、掟雞蛋，影響自己同其他人嘅安全，警方對此感到好失望。