波記燒鴨燒唔切

【明報專訊】屹立石塘嘴40年嘅波記燒臘粉麵，近日登上《米芝蓮指南香港澳門2014》嘅「車胎人美食推介」後，就大排長龍。Emily幫襯咗波記十幾年，前日專程帶朋友嚟食，晏晝1點鐘門口已經有十幾二十人排隊，等咗無耐負責人廖小姐出嚟話，啲燒鵝燒鴨燒唔切，叫顧客兩點鐘再嚟，但唔少人一於少理繼續排隊。Emily諗住夜晚再去食過，點知平日做埋消夜生意嘅波記，7點幾已經賣晒收工。


排隊食波記呢件事喺facebook引起唔少西環街坊討論，好多人擔心佢太多人幫襯，食物質素會變差，又會畀業主加租，亦有街坊批評排隊嘅人羊群心理，竟然要睇人哋定義乜嘢先係美食。今次《米芝蓮》喺皇后大道西其中短短一段，一口氣揀咗3間食店推介，搞到街坊落街食飯都要排隊，西環人真係唔知開心還是傷心。