廉署出App 打機反貪

【明報專訊】廉政公署最近推出智能手機App，會發放最新廉署消息、誠信短片、防貪遊戲等，廉署仲請咗一對靚仔靚女Keyon同Suki做廉政教育主任，佢哋會喺陸續上載App嘅21集誠信短片中，介紹防貪同舉報知識。Emily聽講其中一集會講特首貪污案，唔通之前有人舉報前特首曾蔭權同特首梁振英涉貪有新進展？非也，廉署話條片係想介紹番2008年《防止賄賂條例》修例後，引伸至適用於行政長官咁啫。


另外，個App有個遊戲叫「廉署反貪戰隊」，玩法好似家啲轉珠遊戲咁；程式仲有會員制度，用戶登入後睇片儲分，儲滿分可換廉署防貪漫畫睇。廉署總新媒體宣傳創作主任關偉康話，公署用咗約一年合共40萬元開發呢個App，分別有Android（已上架）同iOS版本（iOS日內上架），目標係想吸引一班20歲以上年輕上班族下載。