聶德權提早返新工

【明報專訊】政府早排公布，原任政務司長私人辦公室專員（特別職務）嘅聶德權，會喺明年2月24日接替黃偉綸出任政府新聞處長，但Emily發現聶德權噚日已去咗新聞處返新工，掛名「政府新聞處處長（候任）」。聶德權話，由家到明年佢會同黃偉綸行孖咇，提早做交接。


聶德權同Emily講，佢喺政務司長辦公室嘅係臨時職位，按規定前日已到期，所以就早少少去新聞處熟習環境，稍後特首梁振英上京述職，佢應該都會跟埋去睇吓。佢話雖然提早兩個月做交接，但扣除聖誕同新年等假期，其實唔係好長。特首辦心戰室另一成員新聞統籌專員馮煒光下周一亦就任，心戰室提早埋班，就可以為梁振英下月發表嘅施政報告出謀獻計。