商交所找數 數碼港做番業主

【明報專訊】噚日數碼港搞聚會，向傳媒講解最新三年發展大計，不過小琴同埋一眾老友難得見到數碼港嘅高層，當然要追問前行會成員張震遠的商交所欠租單野。最難得嘅係，數碼港行政總裁林向陽（圖右，左為主席周文耀）完全無托手踭，對於追租事件是有問必答，據佢講目前商交所已還清所有欠租，雙方仍有租約在身。


林向陽又笑言，數碼港對所有租客一視同仁，只要有欠租就會依法追討。不過作為大企業，做事要跟足程序，先要排期向法庭申請追討租金，之後又要排期執行判令，前後都要搞幾個月，但好彩商交所有交3個月抵押租金。講番數碼港未來3年嘅計劃，佢哋將加碼至2億元去支援資訊及通訊科技（ICT）業界發展，另外創意微型基金嘅資助項目則增至150個。