CY自揭與狼共桌

【明報專訊】一代神獸狼公仔「路姆西」（Lufsig）熱潮席捲特首辦，特首梁振英（CY）噚日以〈與狼共桌〉為題刊出網誌，兼上傳自己同公仔合照，自嘲一下。佢話知道隻公仔「爆紅，網下熱賣、網上熱炒」，證明港人創意無限，所以佢都買咗一隻送畀囡囡做聖誕禮物，同時又可以做善事。另一邊廂，瑞典宜家家居就發聲明，話對公仔譯名嘅廣東話發音造成嘅輿論表示抱歉，所以將佢改名「路福西」。


買畀囡囡做聖誕禮物

CY噚日坐喺辦公室，手揸住寫上「Auckland mayor's scandal」嘅文件，同旁邊路福西合照，仲話自己「與狼共桌」，但究竟邊個係狼就不得而知，因為噚晚已有人改圖，將公仔狼頭同CY個頭對調。Emily想知，CY循乜嘢渠道買到已斷市嘅公仔呢？


特首辦心戰室換班底，要加強輿論攻勢。中大政治與行政學系高級講師蔡子強估計，自上周六財政司長曾俊華被掟蛋後，財爺與CY二人事後處理手法高下立見，CY自覺給比下去，故汲取教訓玩自嘲，不過係單一事件定改公關手法就難講，仲話呢類自嘲對國際級政治家嚟講好普遍。


而宜家就話產品命名會避免涉不雅用語，亦不反映任何政治或宗教取向，故今次要改產品名。


擲公仔遊戲 一日百好評

創意無限嘅香港人，就快手製作咗Android手機遊戲，畀市民模擬喺諮詢會現場向梁、曾二人擲公仔，推出一日已有至少107個5星級好評！唔知CY會唔會下載一個畀阿女玩吓？

呢股熱潮已去到外地，連廣州《羊城晚報》噚日都有報道，仲講明係市民「針砭時弊的對象」，用嚟「以投擲的方式『送』給官員」，不過就無提梁振英個名。