fb港話題 颱風熱過梁振英

【明報專訊】嚟到年尾，facebook公布2013年香港及全球最熱門話題，真係估唔到，今年咁多風雲人物及大事件都「不敵」打風，「颱風」成為引起最多人共鳴嘅話題。FB負責人話，相信係因為「天兔」成為34年以來威脅香港最嚴重嘅颱風，以及「海燕」肆虐菲律賓造成大災害，觸動人心。


facebook大中華區總監梁幼莓就話，家每日將超過290萬香港用戶與其息息相關嘅事件緊密聯繫。回顧過去一年熱話，除咗颱風，排第二及第三位係特首梁振英及新聞多多嘅發展局長陳茂波。3個爭取同志平權嘅代表人物「慢必」陳志全、藝人黃耀明及何韻詩，均人氣高漲（見表）。


港人愛打卡 最多迪士尼

FB都有統計全球國際熱門話題，近日去世嘅南非前總統曼德拉，截至上周五，便引發全球5500萬人通過FB發布超過1.15億次回覆。熱門話題之首就係教宗方濟各（Pope Francis），佢目前有超過426,000個粉絲！


港男港女家鍾意去度邊都「打卡」透露自己行蹤，FB發現，香港迪士尼樂園係最受歡迎簽到地點，其次係海洋公園、尖沙嘴、銅鑼灣、旺角。