大專生最不快樂

【明報專訊】嶺南大學噚日公布2013年港人快樂指數調查，結果顯示，今年比上年嘅70.3分輕微上升至70.5分。若按教育程度睇，反映副學位學歷嘅大專程度階層就最唔開心，10分係滿分，呢個階層就由上年嘅7.04分跌到6.74分。


嶺大：與上流壓力有關

今次調查，訪問咗942名21歲以上人士，將受訪者以學歷分成5組，發現學歷愈高唔必然代表愈快樂。負責研究嘅嶺大公共研究中心主任何濼生話，大專程度呢一組，包括近年愈來愈多嘅副學士，跌幅咁大，情况值得關注咁話。大專學歷唔開心，可能同夾喺大學同預科中間，向上流有壓力有關。相反，舊年最唔快樂嘅小學程度階層，就由6.78分大幅上升到7.24分。


公共政策滿意度僅4.14

何教授話，家社會同政治上有咁多矛盾，香港人都開心過上年，佢話好意外，相信係因為港人自身心理質素好咗。調查仲發現，市民對政府唔太滿意，因為喺對公共政策質素嘅滿意度，10分滿分，呢方面由上年4.77跌到4.14分；居住環境滿意度，亦由上年6.03跌到今年嘅5.75分。