新聞類別
財經
詳情#
【明報專訊】內地發展商財富地產來港推售北京城堡樓盤，入場費7000萬人仔，連「樓神」、長實（0001）執董趙國雄都現身捧場。最搞笑係老趙話第一次見財富老總王喆，話諗住一陣間同佢傾吓有冇合作空間，點知轉頭王喆因為要接待貴客走咗去。財富地產香港知名度唔高，但好多名人來捧場，包括曹光彪個女，仲搵來主辦「海天盛筵」嘅內地遊艇商一起搞合作。
推「北京第一富人區」
管理層話城堡一共82間，最細係1700平方米，位置係北京五環，話係「北京第一富人區」，已經賣出30套，來買嘅人身家都起碼10億人仔，多數係公司老闆。佢覺得擺係香港，5000蚊人仔一呎好抵，希望吸引香港投資者北上投資。王喆急速閃人，據說係突然有位買家要見佢。
呢個豪宅樓盤，除咗普通城堡，更加高級嘅仲有「雙墅王」、「雙院墅王」同埋頂級嘅「北京墅王」。「北京墅王」號稱有9萬平方尺，仲未定價，王喆估計價錢要比依家嘅北京樓王翻倍。
王喆話公司暫時冇計劃來香港上市，主要都喺內地發展，依家喺北京、麗江、三亞有項目，但唔排除嚟香港買地。小琴寄語王總，有心嚟香港「玩」就多啲同香港樓神取經喇！王喆除咗係地產老闆，仲有一間娛樂公司，都幾出名，拍過電影「花木蘭」，佢自己都夾過band出過唱片。王喆話「地產係主業，娛樂係夢想」，真係名利雙收啦。
email: piano@mingpao.com
[小琴密語]
回應 (0)
