田少唱K 點《誓要入刀山》

【明報專訊】自由黨本周一晚搞20周年黨慶，但司局長集體缺席；而經民聯周二晚搞晚宴，高官雲集之餘，律政司長袁國強同多名局長議員仲齊齊高唱《獅子山下》，氣氛融洽。原來同一時間，自由黨黨魁田北俊就同成班黨友前晚一齊去唱卡拉OK，似乎心情唔錯，未受高官冷待事件影響。


經民聯晚宴高官雲集

自由黨前晚拉大隊唱K，田大少同主席周梁淑怡、副主席鍾國斌等都有出席，相當盡興，據講喺K房內田大少都不讓年輕人專美，席間高歌鄭少秋嘅經典名曲《誓要入刀山》，唔知呢首歌又有無寓意？係咪意味該黨日後真係要入刀山呢？另外，周太亦有唱英文歌。


雖然自由黨幾睇得開無司局長現身黨慶，但唔少議員都戥佢哋慘，民主黨何俊仁就話，可惜佢自己去唔到，唔係一定會去支持吓自由黨，佢仲話自由黨家好值得尊敬，現時唔係無自主、無理念，田北俊令成個黨有番尊嚴。仁哥咁樣抬舉自由黨，都唔知係讚佢定係害佢嘞。


經民聯劉皇發噚日見到有出席自由黨黨慶嘅運輸及房屋局副局長邱誠武，更加豎起拇指讚好，大讚對方有膽識，局長唔去，副局都敢去。


有自由黨中人話，今次政府擺明車馬，可能對佢哋都係好事，日後做事唔再需要綁手綁腳喎。