葉建源拉建制票 上門兼送書

【明報專訊】拜票拜到敵陣？新民黨葉劉淑儀議員動議辯論「提振香港數理學術水平風氣，全力支援主辦國際數學大賽」，即係叫政府搞奧數比賽。呢類無約束力嘅議案無乜爭議，估唔到都惹來5個議員提出修訂，包括教育界葉建源。


葉建源（左）借題發揮話，家學生哥做嘅全港性系統評估（TSA），扭曲整個小學同初中階段嘅學習生態，應該取消。葉建源仲好積極為自己議案拉票，噚日Emily目擊佢突然深入建制派工聯會議辦，向陳婉嫻及黃國健拉票，仲送咗本佢以前編寫嘅TSA研究書畀黃國健（右），叫對方睇吓。黃國健見佢咁有誠意，即刻話會認真討論，但究竟乜嘢係TSA，黃國健似乎一頭霧水。無論如何，葉建源嘅拉票方法，「門常開」嘅官員真係值得學習。