入稟人孔允明﹕社署上訴委員羞辱我

【明報專訊】不願出鏡的綜援7年申領資格官司原訴人孔允明（64歲），2005年以單程證來港，她昨晚接受本報電話訪問，談到贏了官司的心情、家人的支持，並剖白當年申領綜援被拒遇到的羞辱。


兩子致電：阿媽原來你咁辛苦勇敢

■﹕孔允明 ■﹕記者

■﹕贏了官司後，身邊人有沒有恭喜或罵你？你心情如何？

■﹕我今日（昨日）買咗7份報紙，我每次睇都淚流滿面，一方面贏咗官司，終於吐咗怨屈氣；一方面又覺得好多人仲係好睇唔起新移民，好悲哀。


我兩個仔（在內地定居）有睇新聞，打電話畀我，話睇到喊咗出嚟，話阿媽原來你咁辛苦、咁勇敢。有朋友傳信息鼓勵我，但係我好記得呢幾年受到嘅冤屈，亦好記得我點樣畀社署上訴委員會鬧。


上訴委員會有5個人，佢哋講咗好難聽嘅說話。我丈夫喺我嚟香港第一日就死咗，對我嚟講係巨變，但佢哋其中一個人話﹕「發生咩巨變啫，你老公好有錢咩？」又有一個人話﹕「你嫁佢時都知窮㗎啦！」咁佢哋唔係羞辱我咩？佢哋係有文化嘅人，但原來有文化嘅人會咁樣羞辱窮人。


佢哋又話﹕「你嚟香港係享受，諗住攞綜援！」其實若果我好彩，丈夫無死到，我仲有屋企（公屋單位未被房署收回），我仍可以執紙皮，唔係逼到走投無路，都唔會想申請綜援（她現已住在公屋）。


■﹕你現時如何維生？生活過得去嗎？

■﹕我嚟香港時做過好多工，洗碗、保安、清潔，十幾蚊一個鐘，一做就12個鐘，試過一日洗100個廁所。家喺街邊派傳單，但唔穩定。我有長期病患和腳底筋膜炎，有時一日企3個鐘，一個月掙到千幾蚊，工資係唔夠生活（社區組織協會施麗珊補充，社協有借錢給孔女士，日後有條件才要求清還），如果我有幸捱到明年65歲，希望可以攞2200蚊生果金。


想做榜樣 「我一樣係自力更生」

■﹕今次判決反映社會很多人不滿新移民，你怎樣看？

■﹕如果成日話新移民攞着數，係咪了解新移民呢？其實你去佢哋屋企睇吓，佢食咩餸你就會知，你去（社區）中心睇吓，佢哋正報讀（什麼）課程裝備自己？無新移民，社會上最低微嘅工作邊個做？佢哋日日喺度捱緊，想做好自己，教導下一代。好多人叫我不如返大陸，但我就係想喺度，做個榜樣畀兩個仔睇，我一樣係自力更生。


明報記者 蔡傳威