譚志源險做「急call局長」

【明報專訊】今年特首梁振英（CY）上京述職宣布加插局長「陪訪」，3名陪訪局長及政府消息人士連日不斷解畫指陪訪行程早已安排，但唔少政界人士都話做法突然兼奇怪。政制及內地事務局長譚志源噚日就挺身話，其實「特首老人家」一早問過佢呢幾日可唔可以一齊去北京。


譚志源噚日去咗港區省級政協委員聯誼會一個政改諮詢座談會做講者，一上台就為自己聲沙道歉，話自己前排去經民聯1周年晚宴唱得太多歌搞到聲沙，之後又自爆其實CY一早同佢講過，今次訪京有啲關於內地事務同政制局有關，所以問佢呢幾日可唔可以赴京。


不過，譚志源話，由於一早已應承出席座談會，所以佢同CY及特首辦主任，「幾經說項」先可以留低出席噚日嘅座談會，否則就會被傳媒話佢喺第四個「被急call」上京局長。咁唔知喺特首辦做過嘅佢，對今次「陪訪」安排惹起咁大迴響，認為有咩可以改善？譚志源笑笑口話「不在其位、不謀其事」。


話九七至今中央都支持施政

至於港澳辦主任王光亞噚日話特首民望非最重要指標，譚志源自言「老氣橫秋」都要講句，自從佢九七回歸後喺特首辦工作至今，每次特首見到領導人時，中央都明確表明支持行政長官和特區政府依法施政，立場從來無改變過。